CHAPITRE I
De l'invention & origine de la colonne Corinthienne,
& de son chapiteau

Ayant monstré au livre precedent les premieres colonnes desquelles on usa à Rome, ensemble l'ordre & ordonnance de colomnes Thuscanes, comme aussi des Doriques & Ioniques, reste maintenant poursuivre & montrer l'ordre Corinthien, lequel Vitruve met pour la troisiéme espece des colomnes, jaçoit qu'il pourroit faire la quatriéme, qui voudroit mettre premiere la colomne Thuscane, come veritablement elle doit estre pour autant qu'elle est plus massive & plus forte que les autres, ainsi qu'il a esté dict cy-devant. Donc vous serez advertis que tout ainsi que la colomne Dorique a esté inventée selon les mesures & proportions de l'homme & la Ionique suivant celles de la femme: ainsi la presente a esté faicte à l'imitation d'un delié & joly corps d'une pucelle. Pour autant que les filles en leur jeune aage ont le corps gresle & menu, & estans bien parées se monstrent beaucoup plus belles, & d'apparence plus exquise, ainsi que les colomnes Corinthiennes. Car elles apparoissent, ou doivent apparoir beacoup plus riches & deliées, plus mignonnes & mieux parées que les autres. Pour cette cause, on leur donne pour leur hauteur plus de huict fois leur diametre par le bas, voire neuf, & plus quelquefois, selon le lieu auquel on les applique. Voila qui les faict monstrer plus gresles et delicates que la Ionique, qui ne doit pas avoir de hauteur que huict fois & demie son diametre pour le plus, & quelquefois moins. Avec ce, le chapiteau Corinthien a de hauteur autant qu'est la largeur de tout le diametre de sa colomne. Ceux qui luy ont voulu donner plus grande beauté, y ont adjousté quelquefois la septiéme partie dudit diametre davantage, comme vous le verrez cy-apres quand je monsteray les mesures dudit chapiteau. Duquel l'invention est attribuée à un nommé Callimachus; qui pour l'excellence & subtilité de son art, en matiere de tailler marbres, fut par les Atheniens surnomé Catatechnos, c'est à dire homme industrieux & plein d'artifice. L'invention en fut telle: Advint un jour qu'apres le deceds & inhumation de quelque jeune fille Corinthienne, sa nourrice, en consolation de ses douleurs, se souvint que ladicte fille en son vivant vouloir prende grandissime plaisir à aucuns vases qu'elle avoit: parquoy en memoire de ce, elle les mist tous dans un panier, & les porta sur la sepulture de sadite fille, pour le soulagement de ses douleurs & recordation de la defuncte. Et afin qu'ils fussent long temps conservez, & deffendus contre l'injure du temps & des pluyes, elle couvrit le panier d'une grosse tuile. Mais notez que par cas fortuit ledit panier fust mis sur une racine d'Acanthe ou branque Ursine, laquelle par succession de temps, pour este empechée & pressée du susdit panier, elle jecta ses tiges environ le printemps tout à l'entour dudit panier, tellement que ainsi que l'herbe croissoit autour d'iceluy, la tuile l'empechoit de monter, & la rabbatoit sur les bords & coings: de sorte qu' elle estoit contrainte de se courber & descendre contre bas: quasi comme vous le voyes aux rouleaux & volutes des chapiteaux qu'on fait aujourd'huy. Passant donc se susdit Callimachus aupres du sepulchre de la susdite Vierge Corinthienne, & voyant l'artifice de nature envers ledit Acanthe & panier, il pratiqua & prit de là l'ornement du chapiteau Corinthien, tel que vous le verrez cy-apres, & pourrez aussi voir au premier chapitre du quatrieme livre de Vitruve. Mais devant qu'entrer à la description dudit chapiteau Corinthien, il me semble qu'il sera tres bon de parler premierement de sa colomne, basse & stylobate.

CHAPITRE III
Du Chapiteau Corinthien

Les chapiteaux de l'ordre Corinthienne seront en cette sorte: Vous prendrez le diametre de leur colomne par le pied ou elle est la plus large, & en ferez un quarré parfaict, dedans lequel vous tirez une ligne diagonale, comme vous la voyez en FG: & de tant qu'elle sera longue vous ferez la largeur de votre chapiteau par le devant au droict de l'abaque, ainsi que vou le voyes estre rapporté depuis A jusques à B, sur l'extremité des cornes du chapiteau. Lesquelles cornes se font en prenant toute la largeur du chapiteau AB, & faisant un triangle equilateral, comme vous le voyez en ABC, puis mettant la pointe du compas au lieu de C, & l'estendant iusques au lieu de D, & finalement faisant une ligne circulaire, lors vous trouverez le cornes dudit chapiteau: & leur largeur au droict de AB, & par le milieu a un chacun endroict de quatre faces, la saillie & largeur que doit avoir la roze marquée E, qui se trouve aux faces dudict chapiteau contre l'abaque, ainsi que vous le pourrez mieux cognoistre (sans vous en faire plus longue escriture) par la figure que vous verrez cy-apres. Le tout se peut beaucoup plus aysément apprendre avec le compas, par ceux qui ont quelque commencement en l'art qu'à l'entendre par long discours. Vous verrez en la prochaine figure le plan de la grosseur de la colomne par le dessus, & par le dessous, avec la hauteur du chapiteau, qui est autant de ladite colomne par le bas, comme FH: semblablement la hauteur de l'abaque D, qui est d'une septiéme partie du diametre de la colomne, & quelque bien peu d'avantage. Le reste du chapiteau dessous l'abaque, iusques au dessus de la colomne est divisé en trois parties égales, desquelles l'une est donnée pour la hauteur des premieres feuilles, & deux parties monstre la hauteur des plus grandes feuilles, & la troisiéme est pour les volutes, qui ne doivent avec les feuilles exceder la ligne droicte, qui va de la corne de l'abaque, iusques au thore ou membre rond de dessus de la colomne, comme vous le pourrez apperçevoir de I à K, en la prochaine figure. Si vous voulez voir le discours de telle matiere dans Vitruve en son quatriéme livre, il vous sera permis, pour en sçavoir faire votre profit, qui n'est pas toujouors bien aysé pour les choses qui y sont fort entrmeslées & sans ordre, comme chacun le void: car au commencement des ordres il parle de la colomne Ionique, apres de la Corinthienne, & puis il reprend la Dorique, sans garder la methode de les conduire l'une apres l'autre, ainsi qu'il faudroit: puis à la fin eds ordres des colomnes, il descrit la Thuscane, qui doit estre la premiere. Qouy qu'il en soit, je n'impute le desordre à Vitruve, mais bien à quelques uns qui l'ont faict imprimer: & pour n'entendre l'art, ils ont tres mal ordonné mes parties de son oeuvre, ainsi que j'ay dit ailleurs.

Back to Book IV, Chapter 1